३१ वैशाख २०७८ 
 कृष्ण शर्मा

दैलेख – आमालाई कुटपिट गरेको बदलामा बञ्चरो प्रहार गरेर दैलेखमा एक युवाले बुबाको हत्या गरेका छन् । डुंगेश्वर गाउँपालिका–६ माथिल्लो डुंगेश्वरबजारका २१ वर्षीय विकास बुढाले ४७ वर्षका आफ्ना बुबा नहकुल बुढाको हत्या गरेको प्रहरीले जनाएको छ ।

‘आमालाई ढुंगाले हानेको चोटले रगत बगेको देखेपछि आक्रोसमा बञ्चरो प्रहार गर्दा बुबाको ज्यान गएको’ प्रारम्भिक अनुसन्धानबाट खुलेको जिल्ला प्रहरी कार्यालय दैलेखका सूचना अधिकारी प्रहरी निरीक्षक इन्द्रजीत सुनारले बताउनुभयो ।
घटनाको बस्तुबस्थिति बुझ्न प्रहरीको अपराध अनुसन्धान टोली घटनास्थलमा पुगेको र थप बिवरण आउन बाँकी रहेको प्रहरी निरीक्षक सुनारले जानकारी दिनुभयो । आरोपित विकास बुढालाई तत्काल नियन्त्रणमा लिई जिल्ला प्रहरी कार्यालयको हिरासतमा राखिएको बताइएको छ ।