काठमाडौैं । नेपाल कम्युनिस्ट पार्टी (नेकपा)को सचिवालय आज बैठक बस्दैछ । दिउँसो ३ बजे बस्ने सचिवालय बैठकले कार्यविभाजनको टुंगो लगाउने तयारी गरेको बालुवाटार स्रोतले जानकारी दियो । कार्यविभाजन टुंगो लगाउन अहिले पार्टी अध्यक्षद्वय केपी शर्मा ओली, पुष्पकमल दाहालसहित वरिष्ठ नेता माधव नेपाल छलफलमा केन्द्रित भएका छन् । शीर्षत्रयसँगै पार्टी महासचिव विष्णु पौडेल पनि छलफलमा रहेको स्रोतले जानकारी दियो ।

शीर्ष नेताहरूले कार्यविभाजन टुंगो लगाउने र सचिवालय बैठकमा प्रस्तुत गर्ने तयारी भएको बालुवाटार स्रोतको भनाइ छ । केन्द्रीय सदस्यहरूको कार्यविभाजन, विभागीय प्रमुखहरू चयन गर्ने विषय पेचिलो बन्दै गएपछि अध्यक्षद्वय ओली–प्रचण्ड दुई–तीनदिन यता दिनहुँ छलफलमा जुटेका छन् ।

 

“जिल्ला र जनसंगठनहरूको इन्चार्ज, सहइन्चार्ज तोक्ने र विभागहरूलाई पूर्णता दिने विषयमा दुईजना अध्यक्षले गृहकार्य गरिरहनुभएको छ । मंगलबार बिहान माधव नेपालसँग पनि परामर्श र छलफल गरेर सचिवालय बैठक बस्ने तयारी भइरहेको,” बालुवाटार स्रोतले बाह्रखरीसँग भन्यो ।

माधव नेपालको प्रस्ताव– संगठन विभाग प्रमुख वामदेव नभए सुरेन्द्र पाण्डेलाई दिऊँ

नेकपाको अन्तरिम विधानले ३२ वटा विभागको व्यवस्था गरेको भए पनि संगठन विभाग प्रतिष्ठाको विषय बनेको छ । र, चारजना नेताले आँखा गाडेका छन् । पार्टी महासचिव विष्णु पौडेलसहित, ईश्वर पोखरेल, वामदेव गौतम र रामबहादुर थापाले संगठन विभाग प्रमुखमा आकांक्षा देखाएका छन् । तर, नेता नेपालले स्रोतका अनुसार नेता नेपालले वामदेवलाई नै प्रस्ताव गरेका छन् । पछिल्लो समय वामदेव ओलीसँग रुष्ट छन् ।

केही दिनअघि अध्यक्ष प्रचण्डले पार्टी एकताका बेला भएको सहमति देखाउँदै १५ महिनापछि सरकारको नेतृत्व आफूले पाउनुपर्ने तर्क गरे । र, प्रचण्डको तर्कमा वामदेवसमेत उभिएका छन् । वामदेवलाई संगठन विभाग दिएर असन्तुष्टि व्यवस्थापन गर्नुपर्ने पक्षमा माधव नेपाल देखिएका छन् । वामदेव गौतम पार्टीको शक्तिशाली जनसंगठन किसान महासंघको अध्यक्ष पनि भएकाले उनको नाममा सहमति नजुटे सुरेन्द्र पाण्डेलाई अघि सार्ने नेपाल पक्षको तयारी छ ।

पार्टी अध्यक्षको प्रचण्डको चाहना गौतम नै भएकाले उनको सम्भावना बढेर गएको नेता बताउँछन् । अध्यक्ष ओली बादललाई संगठन विभाग प्रमुख बनाउने पक्षमा छन् । पोखरेल र पौडेलका पक्षमा नेताहरू खुलेका छैनन् ।

‘प्रतिष्ठाको विषय बनाइयो’
साविक एमालेको संगठन विभाग प्रमुख पृथ्वीसुब्बा गुरुङ थिए । माओवादी केन्द्रको संगठन विभागको कमाण्ड बादलले सम्हाल्दै आएका थिए । एकीकृत पार्टीलाई संगठन विभाग टुंग्याउन हम्मेहम्मे परेको छ । पार्टी अध्यक्ष ओली र प्रचण्ड र सचिवालयका नेताहरू पटकपटक छलफलमा बसे पनि टुंगिन नसकेको नेताहरू बताउँछन् ।
“संगठन विभाग प्रमुख त्यस्तो महत्त्वपूर्ण पद होइन । तर, प्रतिष्ठाको विषय बनाइएकाले टुंग्याउन गाह्रो भयो,” नेकपाका एक नेता बताउँछन् ।

एमालेमा को–को भए संगठन विभाग प्रमुख ?

२०४९ सालको पाँचौँ महाधिवेशनले पार्टी महासचिवमा मदन भण्डारी चयन ग¥यो । ततपश्चात संगठन विभाग प्रमुख जीवराज आश्रित चुनिएका थिए । तर, २०५० सालमा मदन, आश्रित दुवै रहस्मय दुर्घटनामा परेपछि माधव नेपाल महासचिव भएर संगठन विभाग प्रमुख वामदेव गौतम चुनिए । ०५१ सालमा पार्टी सरकारमा गएपछि कार्यवाहक महासचिवको जिम्मेवारी गौतमको काँधमा आयो । र, संगठन विभाग प्रमुख चुनिए– विष्णु पौडेल ।

२०५४ सालको पार्टी विभाजन पछि अमृत बोहोरा संगठन विभाग प्रमुख चुनिए । ०५९ सालको सातौँ महाधिवेशनपछि ईश्वर पोखरेल पार्टी संगठन विभाग प्रमुख चुनिएका थिए । ०६१ असारमा एमाले देउवा नेतृत्वको सरकारका सहभागी भएपछि संगठन विभागको जिम्मेवारी पुनः पौडेलको काँधमा आयो ।
२०६५ फागुनमा सम्पन्न बुटवल महाधिवेशनपछि युवराज ज्ञवाली संगठन विभाग प्रमुख भए ।

२०७१ साउनमा सकिएको नवौँ महाधिवेशनपछि भने पृथ्वीसुब्बा गुरुङ संगठन विभाग प्रमुख थिए । कमिटी र पार्टी सदस्यहरूको लगत राख्ने र आधारतभूत तहका पार्टी कमिटीसँग सीधा सम्बन्ध काय हुनेहुनाले कम्युनिस्ट पार्टीमा संगठन विभागको विशेष महत्त्व रहन्छ । त्यसबाहेक अन्य महत्त्वपूर्ण विभागको जिम्मेवारीको पनि सचिवालयकै नेतालाई बाँड्ने तयारी छ ।

विदेश विभाग प्रमुखमा माधव नेपाल, स्कुल विभाग झलनाथ खनाल, आर्थिक विभाग प्रमुख ईश्वर पोखरेलको चर्चा रहेको स्रोत बताउँछ ।